2.
Slikt skal vngum bøtæ firi vaþæ sar sum gamblum. Slikt skal firi kono sar bøtæ sum karmanz. Slikt skal konæ bøtæ sum takæ. § 1. Vetir barn barni sar, þæt ma eigh annæt hetæ æn vaþi. Þæt skal slikæ vaþæ bot takæ, sum tald ær, sæx øræ. § 2. Dræpær barn barn, bøte firi þrer mærkær.
3.
Þræl far vaþæ sar, ma eigh firi bondæ biærghæs, liggær attæ daghæ, þa skal bøtæ ørtogh. Liggær han sæxtan daghæ, bøte tvar ørtoghor. Liggær han fiuræ daghæ ok tiughu, þa bøte øre. Þy at han længær liggi, far iki meræ firi þæt. § 1. Lækisgæf skal firi latæ, þæt æru þrir ørær, iki meræ, num han þore sværiæ mæþ tylptær eþe, at han gaf halfmark. § 2. Mætæ skal þræls læstir. Sva myklu sum han ær værri, sva myklu skal minnæ bøtæ, ok samælund firi frælsgiuæ.
4.
Æn ætboren maþær far vaþæ skeno, þarf hvarti viþ spik ællær spiær, þa a han iamnæþær eþ mæþ sættær gærþ: „sva se mær guþ holl ok vattum minum, at æn iak gaf þær slikæ sak, sum þu giuær nu mær, þa vildi iak slikum rætti vnæ, sum nu førir iak þær fram.“
5.
Sarghær hundær ællær annær fænæþær, þa skal bøtæ øræ tva firi sar ok øræ þrea firi lækisgæf, num han þore vitæ til halfmark mæþ tylptær eþe.
